كتير أوي أوي تروح كافيه او مطعم و تلاقي ترابيزة عجبتك اوي .. تجري عليها عشان تقعد تلاقي ال Waiter يقولك بكل لباقة
“سوري يا فندم بس الترابيزة ديه محجوزة” .. فمتقق بعينك اكتر على الترابيزة تلاقي حاجة مكتوب عليها
((Reserved))
انا شخصيا بتضايق اوي .. دائما بتضايق لما تلاقي الحاجة اللي انت حاببها محجوزة لغيرك 😀
كذلك في شغلك لو انت IT و تلاقي جهاز معين جيه ياخد IP و استلم ال IP و فجاءة يقولك !!
“IP is conflicted”
فاقد الشيء .. لا يعطيه .. هكذا الحال لما نيجي نتكلم عن ال DHCP-Server .. مبدئيا كده عايزين نتفق مع شوية مباديء ^_^
أولا: ال DHCP-Server بيبقى عنده خانة مهمة جدا ليها اكتر من مسمى (ولكن كل المسميات تعني نفس الشيء) مثلا في سيسكو إسمه Current Index
يعني ايه ال Current Index ؟؟!!
يعني أول IP ال DHCP-Server هيفكر يديه لجهاز لما يستلم DHCP-Discover Packet “ال DHCP-Discover Packet ديه الباكت اللي بيبعتها الجهاز إللي طالب IP”
ثانيا: ال DHCP-Server ممكن يكون موجود داخل الشبكة اللي موجود فيها الجهاز إللي هياخد IP و ممكن يكون خارجها
ثالثا: ال DHCP-Server قبل ما يدي ال IP للجهاز .. لابد إنه يتأكد من إجابة سؤال منطقي جدا
“هل فيه جهاز في الشبكة ديه واخد نفس ال IP” ؟!!
إذن .. لابد من آلية معينة تخلي ال DHCP-Server يقدر يعرف هل فيه جهاز شايل ال IP ده ولا لأ
و الآلية ديه تختلف لو كان ال DHCP-Server موجود مع ال DHCP-Client في نفس الشبكة أو خارجها ^_^
1-بالنسبة لو كان ال DHCP-Server موجود مع ال DHCP-Client في نفس الشبكة:
فهنا يجري و يبص على ال ARP Cache Table .. يشوف هل عنده ال IP ده قصاد ال MAC و لا لأ
لو لقاه .. يبعت ICMP Echo Request و يفضل حاطط إيده على خده مستني ال ICMP Echo Reply
اسئل نفسك سؤال ؟!!
لو كان بالفعل جهاز شايل ال IP ده و إستلم ال ICMP Echo Request .. الجهاز المفترض يعمل ايه ؟!!
يبعت ICMP Echo Reply صح ؟!!
لو استلم ال ICMP Echo Reply ال DHCP-Server يدرك إن ال IP ده مشغول و Not Available بالتالي يبدء يزود في ال Current Index بقيمة واحد
يعني لو كان ال Current Index موجود تحته
10.0.0.2 و كان ال IP ده مشغول يحط مكانه 10.0.0.3 و يعمل نفس ال Checking Mechanism
لو ال DHCP-Server ملقاش اصلا ال IP في ال ARP Cache Table هيعمل ايه ؟!!
هيبعت ARP Request و يصرخ في الشبكة بعلو صوته و يقول
(الجهاز إللي ال IP بتاعه 10.0.0.2 يبعتلي ال MAC بتاعته)
طبعا لو جهاز فعلا شايل ال IP ده هيرد بال MAC و لو مفيش جهاز في الشبكة شايل ال IP ده يبقى ال DHCP Server هيدرك إن ال IP متاااح و يديه لل DHCP-Client ^_^
2-لو كان ال DHCP-Server خارج الشبكة .. مبيلجأش لخيار انه يبعت ARP لأن ال DHCP-Client او الشبكة اللي هيوزع جواها مش معاه في نفس الشبكة و زي ما احنا عارفين ال ARP اصلا باكت برودكاست .. فمفيش راوتر هيستلم البرودكاست على إنترفيس و يخرجها من انترفيس تاني
طب يعمل ايه عشان يتأكد ال IP متاح ؟!!
يبعت ICMP Echo Request .. و بالتالي لو استلم ICMP Echo Reply يدرك ان ال IP فيه جهاز شايله و مشغول و غير متاح .. و لو مستلمهاش يدرك إن ال IP متاح و يديه لل DHCP-Client عادي جدا ^_^
