ما هي الكابلات الكهربائية ؟

الكابلات الكهربائية هي الموصلات اللي بيمر فيها التيار اللي من خلالها بنقدر ننقل الكهرباء من مكان لمكان و نقدر ننقل الكهرباء من محطات الانتاج لحد الاحمال الموجودة في المصانع و المباني و من هنا جت اهمية تصنيف الكابلات و تقسيمها لانواع مختلفة داخل كل تصنيف.
فالكابلات انواع مختلفة و بيتم تصنيفها على اسس كتير و مختلفة زي جهد التشغيل اللي هيشتغل عليه الكابل و نوع الموصل المستخدم في الكابل و نوع العازل المستخدم مع الكابل و عدد ال cores الموجودة في الكابل و كمان ممكن يتم تصنيفها بناء على المجال و طبيعة العمل اللي هتشتغل فيه الكابلات و كمان بتصنف الكابلات لكابلات مسلحة و كابلات غير مسلحة.

هنبدأ دلوقتي مع بعض نشرح كل تصنيف من التصنيفات دي و نقول ايه هي انواع الكابلات اللي بتندرج تحت كل تصنيف.

 اول عامل تصنيف الكابلات تبعا لجهد التشغيل ده معناه تصنيف الكابلات طبقا للجهد المستخدم او الجهد اللي هتشتغل عليه الكابلات

و ده بينقسم لانواع مختلفة كابلات الجهد المنخفض و دي بتكون جهدها اقل من 1 كيلو فولت و كابلات الجهد المتوسط و دي بيكون جهدها اعلى من 1 كيلو فولت لحد 66 كيلو فولت و كابلات الجهد العالي و دي بيكون جهدها اعلى من 66 كيلو فولت لحد 132 كيلو فولت و كابلات الجهد الفائق و ده بيكون جهدها اعلى من 132 كيلو فولت لحد 500 كيلو فولت و طبعا كل ما تزيد جهد الكابل بيزيد كفاءة عزل لان ارتفاع الجهد بيتسبب في ارتفاع التيار و ده بيؤدي لزيادة ال losses و بالتالي زيادة حرارة الكابل و ده السبب في زيادة عزل الكابل و زيادة كفاءته.

تاني عامل من عوامل تصنيف الكابلات هو تصنيف الكابلات حسب نوع الموصل المستخدم لنقل الكهرباء في الكابل

و هنا في نوعين من الموصلات المستخدمة في الكابلات فالنوع الاول هو النحاس و النوع التاني هو الالومنيوم

و طبعا النحاس معامل التوصيل بتاعه اعلى من الالومنيوم و بيتحمل اجهادات اعلى من الالومنيوم و لكن النحاس سعره اغلى و وزنه اتقل في المقابل الالومنيوم معامل التوصيل بتاعه اقل من النحاس و مقاومته اعلى مرة و نص من النحاس و لكن سعره اقل و وزنه اخف علشان كده كابلات الالومنيوم بتستخدم في شبكات الجهد المتوسط بسبب خف وزنها و رخص سعرها لانها بتكون مسافات كبيرة جدا بتوصل لكيلومترات كتير.

تالت عامل من عوامل تصنيف الكابلات هو تصنيف الكابلات حسب نوع العزل المستخدم في الكابل

ففي 6 انواع من العزل في الكابلات و هما pvc اللي هو البولي فينيل كلورايد و النوع ده بيتميز بخواص كهربية ممتازة عند الجهود المنخفضة و درجات الحرارة المنخفضة و ده زائد ان سعره ارخص و بتستخدم كابلات ال PVC مع الجهود لحد 1 كيلو فولت لان ال PVC ال break down voltage اللي هو جهد الانكسار بتاعه ا كيلو فولت

و النوع التاني هو XLPE و هو البولي ايثلين و النوع ده بيتميز بمقاومة عالية للرطوبة و قدرته على تحمل درجات حرارة عالية و تحمل ال over load , short circuit

و النوع ده بيستخدم مع كابلات الجهد المتوسط و كابلات الجهد العالي و النوع التالت هو العوازل المطاطية و اهم نوع فيها هو الايثلين بروبلين و النوع ده بيتميز بمقاومته للمياه و النوع الرابع هو الورق المشبع بالزيت و النوع الخامس هو الحرير و القطن و النوع السادس و الاخير هو الورنيش.

و رابع عامل من عوامل تصنيف الكابلات هو تصنيف الكابلات تبعا لعدد ال cores المستخدمة في الكابل

فاما ان يكون الكابل single core وده معناه ان الكابل بيكون فيه موصل واحد بس اللي هو الخاص بالفازة الواحدة او يكون الكابل multi core

و في النوع ده بيحتوي الكابل على 4 موصلات و هما 3 مواصلات بتوع ال 3 فازات و الموصل الرابع الخاص بال neutral و ممكن يكون في واحد خامس خاص بال earthing و عموما بيفضل النوع multi core بسبب سهولة التعامل معاه في النقل و التمديد في المواسير و ان مجموع الفيض فيه بيساوي صفر و بالتالي مش هيسبب اي induced currents في اي كابلات تانية جمبه.

و لكن في مقاطع الكابلات الكبيرة اللي اكبر من 240 مم2 بيكون في صعوبة في تمديد الكابلات و لفها على البكرات و بالتالي بيفضل في حالات المقاطع الكبيرة استخدام كابلات ال single core.

اخر حاجة في العوامل اللي على اساسها بيتم تصنيف الكابلات هي التسليح

هل الكابل ده مسلح و لا لا فالكابلات بتصنف الى armored cables اللي هي كابلات مسلحة و non armored cables اللي هي كابلات غير مسلحة

و التسليح ده بيكون عبارة عن شريط صلب بيترواح سمكه ما بين 0.1 ل 0.5 مللي متر و بيتلف حولين الكابل من الخارج علشان يخلي الكابل يتميز بصلابة ميكانيكية تحميه من الضغوط الخارجية زي وزن التربة لو كان الكابل مدفون في الارض و العربيات اللي هتمر من فوق الكابل و بالتالي الكابلات اللي بتكون مسلحة هي الكابلات المدفونة في الارض او اللي بتكون موجودة تحت شبكة الطرق و لكن الكابلات الموجودة في المباني او على cable trays مبتكنش معرضة لاي ضغوط ميكانيكية علشان كده بنستخدم معاها non armored cables اللي هي كابلات غير مسلحة و طبعا التسليح ده بيقلل بشكل كبير من مرونة الكابل و سهولة التعامل معاه و سهولة تمديده.