اربعة عشر قاعدة انصحك تتبعها ولما تتبع تلك القواعد تنجح في شغلك صح ارجو القراءة بتمعن وفهم لهذا المقال :-

1- اوعى تستنى كلمة شكرأً من مديرك او من اى حد من زمايلك .
2- ماتقارنش نفسك باى شخص – دايما المقارنات بتخلق صراعات ملهاش اى لازمة .
3- اوعى تقول ده مرتبه اعلى وانا اقل – انت رضيت تشتغل بالمرتب ده فـ ملهاش لازمة المقارنة .
4- خليك دايماً متاكد ان ربنا مش هيضيع تعبك .
5- اوعى تنسحب من مكانك و تاخد قرار انك تمشى عشان زميلك مش بيحبك او مشكلة شخصية مع حد معاك فى الشغل او مديرك متضايق منك ( كل حاجة بتاخد وقتها و بتخلص ) .

6- المقولة دى خليها دايماً قدامك ( الشغل احسن من الكلام ) فركز فى شغلك احسن .
7- اوعى تحكى موقف شخصى او اى حاجة شخصية فى الشغل مكان الشغل خاص بالشغل .
8- اوعى تدخل فى مناقشة مع اى شخص فاكر نفسة علامة عصره و مجاله و مش بيقبل وجهة النظر.
9- للاسف معظم الادارات بتبقى عاملة احزاب وكل اتنين او تلاته بيجاملوا بعض على حساب الشغل .
10- الراتب الشهرى لو انت شايف ان مرتبك قليل – قدم طلب زيادة – شوف فرصة تانية بس هتقعد تقول شركة ظالمة وتفضل قاعد بالسنين بتتكلم و خلاص ( ده فشل ) .
11- كل 6 شهور لازم على الأقل تعمل إنترفيو – تشوف السوق وصل لايه و ثمنك في السوق و تعرف عيوبك وتطور نفسك .
12- احترام شغلك و ما تقللش منه .. إنت مهم .. سامعني ؟ .. إنت مهم .
13- اوعى تفضل تسقف و تهلل لاى حد عشان انت خايف على اكل عيشك .. صدقنى رزقك فى ايد ربنا .
14- احترامك لنفسك معناه احترام الناس ليك – اوعى تدى حد اكتر من حجمه فى اى حاجة.