للاسف انا مبخفش اخسر شغل ودي حاجة سيئة بالنسبة لاي حد بيشغلك
لكن فكرة ان من يوم وفاة والدي الله يرحمه وانا اتعلمت درس ان محدش هيقف معاك خليتني من يومها معتمد على الله ثم على نفسي بلغة زمان أرزقي يعني رزقي على الله
مش على عبد وبلغة اليوم فريلانسر فبتتعلم ان رزقك هو ال كتبه ربنا ليك وكل ال عليك تاخد بالاسباب مش اكتر وكتير جدا بنلاقي الرزق جاي من باب ثاني.
للاسف المفهوم ده صعب على نفسية ناس كتير خاصة الموظف ال عمره ما جرب يشتغل يوم بيومه او يشتغل شغل خاص بيه
او يقعد يوم او اسبوع او شهر مش لاقي شغل وممكن سنة كمان
هنا مش بقول مين احسن من الثاني لكن فكرة ان شاب ظروفه المادية صعبة، بسبب ظروف شغله يتم تصفيته فيطب ساكت ويموت
صعبة جدا جدا
ايا كنت وكانت مهنتك ايه وشغلك ايه
ابدأ اتعلم حرفة الكترونية اشتغل بيها جمب شغلك زود دخلك والحرف الالكترونية كتير جدا وعددها مهول وهتزيد جدا جدا جدا الفترة القادمة
وال بيتسغنى عنك اليوم هيضطر يدفع لك أكثر بكرة كفري لانس
رزقك على الله مش على العباد هم اسباب مش اكثر
رزقك هييجي لك سواء سرقته او اشتغلته مش هتاخد غير المكتوب
فمتحرقش قلب ام عليك ولا تخلي ابن يعيش بالقهر من بعدك
الافكار كثير جدا في العالم الرقمي
عشان أقرب لك الصورة
تخيل اه تخيل واحد ساكن جمب الاهرامات بيعرض على صفحته ان اي حد عايز يتصور جمب الهرم يبعت صورة له وهو يصوره جمب الهرم وبياخد عليها 5 دولار
واحد تاني عامل صفحة على الفيس وبيقولك ارسل اسمك وانا اكتبه لك بالعربي بخط جميل وبياخد على الاسم 5 دولار
افكار بسيطة وممكن تفتكرها شغل اونطة لكنها في الحقيقة بتمثل احتياج عند البعض وهم موافقين خلاص وماله
دي افكار بسيطة
تخيل بقه لو اتعلمت تصميم اعلاني ولا برمجة ولا تحليل بيانات ولا حاجة من الحاجات الفخيمة ال دوراتها اليوم مالية الفيس بوك ومجانا على منصات كبيرة ومحترمة
متمتش عشان فقدت شغل
الشغل وسيلة للتكسب مش هدف في الحياة
لو فقدت شغل اعرف ان دي دفعة عشان تنتقل لحاجة افضل واعلى
عشان تعيد تنظيم وقتك وحياتك حتى لو رزقك يوم بيوم ومحتاج دواء ضروري
والله والله مش هتكون ارحم بنفسك على نفسك من رحمة ربك
فقط شوف الابواب ودور عليها
دايما هتلاقيه فتح لك باب بس انت الـ واقف تعيط على باب مقفول معدش معاك مفتاحه
وربنا يرحمه ويرحم كل شاب جميل بيسعى على رزقه ورزق اهله