تجربتي الشخصية لجهاز شاوومي Mi11 Ultra
تجربتي الشخصية لجهاز شاوومي Mi11 Ultra بعد بضعة أشهر من إستخدام هذا الجهاز الجبار سأشارك لكم تلك التجربة وهو حقا جهاز جبار بمعنى الكلمة فلنبدأ :
• الشاشة :- الشاشة هي AMOLED 10-bit قياس 6.81 إنش دقتها QHD+ و ترددها 120Hz تدعم HDR10+ و Dolby Vision و محمية بطبقة GG victus يعني مقاومة للصدمات لكن سهل خدشها و لذلك الجهاز يجي بلزكة بلاستك مثبتة عليه مسبقاً تحمي الجهاز من الخدوش و يجي ويا حافظة شفافة هم. أني من النوع الي احب الشاشات المنحنية فشكلها كلش حلو و مع ذلك بيها عيب بارز و هي انه الشاشة مو LTPO يعني متغير تردد بين 120Hz و 1Hz علمود توفر طاقة فهنا الشاشة تكدر تنزل لحد 30Hz كحد ادنى علمود توفر طاقة، اما الاضاءة فجداً جداً عالية بحيث اذا تخلي خلفية بيضة بالليل و بأعلى اضاءة تقريباً تنور الغرفة.
• الأداء :- معالج الجهاز هو سناب دراكون 888 معالج معروف و المعروف ويا هو الحماوة، بالأستخدام العادي بعض الاحيان الجهاز بارد و بعض الاحيان تحسه دافي حسب الاستخدام اما بالالعاب مثل genshin impact فيشغل اللعبة على اعدادات متوسطة كأعدادات افتراضية و على اعدادات متوسطة و 60 فريم بعد نص ساعة من اللعب بقت الفريمات ثابته و منزلت أقل 55 فريم و بالاستخدام العادي ماكو أي قصور من هالناحية سلاسة و تصفح سريع بدون تعليك.
• البطارية :- البطارية حجمها 5000mAh تشحن بقدرة 67W سلكي و 67W لاسلكي بأستخدام شاحن مخصص و يدعم الشحن العكسي، الشاحن السلكي يكون منفصل و مجاني (لتخلون المحلات تقطكم الشاحن مجاني) ، بأستخدام تصفح فقط بدون ما افتح الكاميرا و بدون أي لعبة و على اعدادات 120Hz و دقة FHD+ ينطيني حوالي 7 ساعات من 100% لحد 1% و طبعاً الوقت يختلف حسب الاستخدام.
• الواجهة :- الجهاز يجي بواجهة MIUI 12.5 على اندرويد 11 من الباكيت و يتحدث لـ MIUI 12.5E ، الواجهة هنا مواجهتني أي مشكلة بيها ولا خطأ ولا أي شي ، الواجهة سلسلة لكن شكلها تحسه طفولي و الترتيب مخربط اصلاً ميعتبر ترتيب لكنها متروسة اضافات و خيارات تفيد المستخدم و صراحة المشاكل الوحيدة الي دتطلع هي بتطبيقات كوكل فقط مثل الكوكل بلي مرات ميطلع قائمة التحديثات الا تسويله ايقاف اجباري و هذا الشي جان يصير عندي بالون بلص و حتى بجهازي الأونر الي ما بي خدمات كوكل. فبعد هيج قررت انه ابدل الجهاز للروم الاندنوسي علمود اطير تطبيقات كوكل من النظام و الي تسوي تلكأ و تزيد من سوء تجربه الاستخدام.
• الكاميرا :- ابرز شي بالجهاز هو الكاميرات الخلفية ، 3 كاميرات الاساسية بدقة 50MP مستشعر سامسونك حجمه جبير لذلك بالعزل لتشيل همة اعتمد عليه يعزلك أي شي تخليه كبال الكاميرا و الثانية هي عدسة واسعة بدقة 48MP و هي اوسع كاميرا على موبايل الوانها و تفاصيلها حلوة كلش و تقريبا مثل الاساسية و الثالثة هي عدسة بيروسكوب تيليفوتو بدقة 48MP زومها البصري ×5 و زومها الالكتروني ×120 و اني صراحة من استخدم الزوم الا لتصوير القمر و بعض الاحيان يكون مفيد جداً ، و الشغلة الثانية المهمة هي الشاشة الصغيرة و الي تكدر تستخدمها كسيلفي و تستفاد من كلشي ذكرته فوك + الكاميرا الامامية اصلاً مو قاصرة و حلوة حسب مشفتها لكن بالاخير اني مو خبير و حخلي امثلة للصور بالمنشور و انتوا حكموا. (ما استخدمتها هواي و حضيف صور بالمستقبل).
• اشياء إضافية :-
– الجهاز مقاوم للماء و الغبار بمعيار IP68 يعني عمق متر ونص لمدة 30 دقيقة
– السماعات ستيريو تعاونت بيها شاوومي وية Harman/Kardon صوتها عالي و نقي و حلو يعني
– هزاز الجهاز ايضاً زين و تقريباً كل حركة تسويها بالنظام تقابلها هزة و هالشي تكدر توكفه علمود تحافظ على الطاقة.
– الجهاز بي منفذ AR مدري IR حتى تتحكم من خلاله بالأجهزة الالكترونية مثل أجهزة التلفاز و جهاز شاوومي Mi box وغيرهن من الأجهزة الدعومة ، شي نادر بهيج فئة.
– وزن الجهاز ثكيل و الظهر من السيراميك و المفروض يتحمل صدمات ، تكدر تسند اصبعك جوة الكاميرا و تسهلك الاستخدام.
و بس هيج، هاية جانت تجربتي الشخصية و أي سؤال غير السعر اني حاضر (لأنه مو ثابت).
تفاصيل أكثر اضيفها من استخدم الجهاز أكثر.
