كيف تكتب محتوى جذاب ؟
هاد سؤال بيقابل كل شخص بيشتغل بالتسويق عبر منصات التواصل الاجتماعي أو التسويق عبر محركات البحث و أشهرها على الاطلاق محرك بحث Google و خصوصاً الناس الي وظيفتهم الأساسية صنع المحتوى (Content Creation)
في مقولة مشهورة بتحكي (Content is the king) يعني المحتوى هو الملك عشان هيك لازم تكون بتعرف جميع أنواع المحتوى خصوصاً المحتوى الي بخلي العميل المحتمل بنسبة كبيرة يشتري.
مبدئياً المحتوى أنواع كتيرة بس لازم تفهم شغلة مهمة لازم محتواك بشكل أو بآخر يحل مشكلة عند العميل أو يضيفله معلومة أو قيمة لحتى يشتري منك يعني قبل ما تبدا لازم تفكر بالرسالة الي بدك توصلها للعميل و شو أفضل طريقة لحتى توصلها.
نحكي اكتر عن أنواع المحتوى و أهمها:
١-محتوى بحل مشكلة عند العميل بشكل صريح و هاد النوع بيطلب منك تحدد المشكلة أو المشاكل اللي ممكن تكون موجودة عند العميل و بعدين احكيلو شو العواقب الي بتترتب ع المشكلة و بعدين اعطي الحلول الموجودة و اخر شي اعطي الحل الامثل للمشكلة
مثال انتا عندك اكاديمية بتعطي دورات تعليم اللغة الإنجليزية اول شي الشخص المستهدف بالنسبة الك هو اي حدا ضعيف بالانجليزي و حابب يقوي حالو باللغة ازن هاي هي المشكلة بعدين رح تحكيلو عن عواقب المشكلة انه اللغة الانجليزية لغة العصر و ازا ما تعلمها رح تضيع عليه فرص كتيرة و وظائف بتتطلب اللغة كشرط أساسي بعدين بتحكيلو عن الطريقة الأمثل ليتعلم و بتشرحلو عن الكورس تبعك و هيك بتكون اعطيتو الحل الأمثل.
٢-محتوى قصصي بداخله مشكلة يعاني منها العميل و كيف تم حلها،
هاد النوع ممكن تعملو كحوار بين شخصين و كيف انه الخدمة أو المنتج تبعك حلله المشكلة.
٣- محتوى بقدم معلومة و هاد النوع مهم جداً و لازم تكون المعلومة صحيحة و من مصدر موثوق و لازم تهتم تعطي المعلومة للعميل من خلال صفحتك و مو لازم تكون كل بوستاتك بيع مباشر فقط.
٤-محتوى بيحكي بشكل مباشر عن البراند تبعك و كيف انه رح يفيد العميل هاد النوع مناسب للصفحات الجديدة الي بتكون بمرحلة (Brand Awareness).
٥- محتوى بيتبع الترندات الموجودة عالسوشال ميديا ( محتوى مسلي أو محتوى فكاهي ) الغرض منه جذب الانتباه.
أكيد في أنواع تانية للمحتوى و ممكن تذكروها بالتعليقات حتى نستفيد منها.
