Tag

مصور محترف Archives – IT Solutions

كيف التقط صورة بطريقة احترافية

شايف لمن تريد تأخذ صورة لطفل أو بزونة و تلاحظ الصورة دائماً مغوشة بسبب حركتهم السريعة ؟

أو شايف لمن تريد تأخذ صورة بالليل و تطلع الصورة ظلمة و مغوشة و مليانة تشويش ؟
بكل بساطة السبب يرجع إلى شغلتين أساسيات بعالم التصوير و هي الشتر سبيد و الآيزو و تكدر تتحكم بيهم من خلال الوضع الإحترافي Pro Mode

بالبداية خلي نحجي عن الآيزو ISO
الآيزو يتحكم بحساسية مستشعر الكاميرا للضوء … يعني كلما يكون الآيزو أعلى رح تكون الصورة إضائتها أعلى لكن بالمقابل يزداد التشويش (التشويش أو النويز Noise هو عبارة عن نقاط ملونة تشوفها بالصورة لمن يكون الآيزو مرتفع و هذا الشي كلش شائع بالتصوير الليلي) و كلما تقلل الآيزو رح تقل الإضاءة لكن بالمقابل الصورة تكون كلش نظيفة و واضحة .. و لهذا دائماً تلاحظ صور النهار تكون كلش واضحة لأن الجهاز تلقائياً يقلل الآيزو … لأن أصلاً إضاءة الشمس كلش عالية و متحتاج ترفع الآيزو ⁦??‍♂️⁩

و هسة نجي على الشتر سبيد Shutter Speed
الشتر سبيد هو يتحكم بسرعة إلتقاط الكاميرا للضوء … و قبل لا نحجي عنة لازم بالبداية تعرف شون يشتغل و شوية السالفة معقدة يعني تحتاج تجرب بنفسك حتى تفهم أكثر ? بس بالمختصر كلما يكون الرقم عالي مثلاً 1/1000 (يقرأ ألف جزء بالثانية) رح تكون سرعة الشتر سبيد كلش عالية و سريعة … و كلما يكون الرقم أقل يعني مثلاً 1/10 (يقرأ عشر أجزاء بالثانية) رح تكون سرعة الشتر أبطئ و الصورة تأخذ فترة أطول حتى تلتقط و ممكن بأقل حركة من أيدك تصير الصورة مغوشة بس من إيجابياتة هو لمن تخلي سرعة الشتر لفترة طويلة يعني 5 ثواني أو أكثر ، الكاميرا تلقائياً رح تحاول تلتقط أكبر كمية من الإضاءة و هذا الشي يفيدك بالتصوير الليلي

و الشتر سبيد كلما يكون أسرع رح تكون الصورة ثابتة أكثر و بدون أي إهتزازات ناتجة بسبب الحركة لكن بالمقابل الكاميرا متلحك تلتقط كمية الإضاءة اللازمة لهذا دائماً كلما ترفع سرعة الشتر تلاحظ الصورة تكون ظلمة و تحتاج يا أما ترفع الآيزو أو تروح بمكان إضائتة كلش عالية أو تستعمل الفلاش حتى تعوض الظلام الناقص … و لهذا إذا تريد تصور شي يتحرك بسرعة (مثل الصورة الأخيرة بالمنشور) تحتاج تصورها بالنهار حتى يكون الآيزو قليل و الصورة تكون كلش واضحة :›
و معلومة ثانية … إذا ترفع الشتر سبيد لسرعات عالية مثل 1/4000 تكدر تصور اي شي بوضوح تام حتى لو الشي جان كلش كلش سريع و يمكن متكدر تشوفة بعينك المجردة / مثل قطرات الماء أو حتى ممكن تصور سيارة تتحرك بسرعة 200 كيلو بالساعة بوضوح تام إذا ترفع الشتر سبيد !!!

و هسة آخر شي نحجي على التصوير الليلي و شون الشتر سبيد و الآيزو ممكن يأثر على صورك بالكامل
طبعاً هذا الشي يحتاج تجربة بنفسك يعني ماكو إعدادات ترهم بكل انواع الإضاءة الليلية

و إذا تريد تصوير ليلي واضح يحتاج تخلي الشتر سبيد لمدة طويلة يعني 5 ثواني أو حتى أكثر و دائماً حاول تقلل الآيزو حتى يطيك صور كلش واضحة و نظيفة … و حالياً أعتقد أنت صرت تعرف كلما يكون الشتر سبيد بطيئ رح تحتاج تخلي الجهاز ثابت أكثر و بدون حركة … لهذا دائماً تحتاج تخلي الجهاز على ستاند أو تثبتة بأي شي قريب يمك حتى ميتحرك :›
و حاول تستخدم مؤقت التصوير يعني لمن تضغط الصورة رح تتأخر ثواني يلا تبدي تصور حتى الجهاز ميتحرك بسبب ضغطة أيدك و تصير الصورة بالكامل مغوشة ?

و آخر شي رح نحجي على تصوير النجوم أو الفضاء بشكل عام Astro Photography و صدكني تكدر تصور النجوم و حتى مجرة درب التبانة من خلال موبايلك !!!
صحيح الجودة رح تكون أضعف من الكاميرات الإحترافية لكن بالنهاية تطيك نفس النتيجة

و حتى تصور النجوم تحتاج تخلي سرعة الشتر سبيد مدة كلش طويلة يعني 15 ثانية أو أكثر و الآيزو كلش عالي يعني 1600 أو أكثر و أهم شي تحتاج تروح بمكان كلش كلش أظلم بعيداً عن أضواء المدينة و الشوارع حتى تصور النجوم بوضوح و تكدر تبحث عن هذا الموضوع و تفهم أكثر :›

طبعاً اكو بعض الأجهزة مثل أجهزة الآيفون (فقط إلي تدعم الوضع الليلي) و الكوكل بكسل و حتى أجهزة هواوي الحديثة فئة الفلاكشب تخليك تصور النجوم بوضوح تام … كل إلي تحتاجة هو تخلي الموبايل على ستاند و الجهاز تلقائياً يعرف أنت خليتة على ستاند (لمن يتوقف الجايروسكوب عن الحركة) و مجرد تروح تأخذ صورة بالوضع الليلي و الجهاز تلقائياً يبدي يأخذ صورة بشتر سبيد تتراوح مدتة بين 15 ثانية إلى 30 ثانية يعني حتى أقوى من الوضع المحترف !!! و بعدها يطيك صورة كلش واضحة و تكدر تشوف النجوم بنفسك :›

و آخر شي معلومات عن جهازي (كل الصور بالمنشور مأخذها بجهازي) … أسمه “هونر 10 لايت” و سعره حالياً 130$ و كاميرتة دقتها فقط 13MP ميگابكسل … يعني متحتاج جهاز سعره 1400$ حتى تطلع صورة إحترافية :›
بس أكو بعض الأجهزة مثل هواوي P30 PRO أو أحدث … يكدر يلتقط صورة بآيزو 409,600 و هذا الشي أقوى و أغلى الكاميرات متكدر تسوي !!!!

كيف تقوم بإزالة باسوورد البيوس بسهولة
كيف يعمل الإنترنت
canon ip7240 إعدادات الواي فاي في طابعة
من صنع أول كمبيوتر ؟
WANNACRY RANSOMWARE الوقاية من فايروسات الفدية
علماء الصين يحولون النحاس إلى ذهب
ZRam Swap ما هو ال
Encapsulation التغليف في البرمجة الكائنية 
الفرق ببساطة بين 32 بت و 64بت
المواقع المفيدة لأى مبرمج
بناء صيغ الميغا بالاكسل
Memoji برنامج يحول صورتك إلى وجوه تعبيرية
حيلة ذكية لاستخدام فيسبوك بشكل خفي